Tuesday, March 6, 2012

தமிழ் மூலம் ஆங்கிலம்

1. வாக்கியம் அமைத்தல்
எந்த மொழியிலும், ஒரு வாக்கியம் சிறியதாக இருந்தாலும் பெரியதாக இருந்தாலும், அதில் இரண்டு விஷயங்கள் இருக்க வேண்டும்.

1) செயல்
2) செயலைச் செய்யும் அல்லது செயலுடன் தொடர்புடைய ஒரு நபர் அல்லது பொருள்.

செயலைக் குறிக்கும் சொல்லைத் தமிழில் 'வினை' என்றும், ஆங்கிலத்தில் 'verb' என்றும் குறிப்பிடுவார்கள்.
செயல் புரிபவர் அல்லது செயலுடன் தொடர்புடையவரைத் தமிழில் 'எழுவாய்' என்றும் ஆங்கிலத்தில் 'subject' என்றும் குறிப்பிடுவார்கள்.

உதாரணமாக,
I walk  நான் நடக்கிறேன்.

இங்கே I என்பது subject அல்லது எழுவாய். 'walk' என்ற சொல் verb அல்லது வினைச்சொல் என்று குறிப்பிடப்படும்.

வாக்கிய அமைப்பில் தமிழுக்கும் ஆங்கிலத்துக்கும் இடையே சில அடிப்படை வேறுபாடுகள் உள்ளன.

1) My name is Bharathi. என் பெயர் பாரதி.
ஆங்கில வாக்கியத்தில் 'is' என்ற வினைச்சொல் வருகிறது. ஆனால் தமிழில் வினைச்சொல் இல்லை. 'இது என் பேனா,' 'இவன் என் நண்பன்,' 'என் சொந்த ஊர் திருச்சி' போன்ற குறிப்பு வாக்கியங்களில் (ஒரு நபரையோ, பொருளையோ, விஷயத்தையோ குறிப்பிட்டுச் சொல்லும் வாக்கியங்கள்), வினைச்சொல் இடம் பெறாது. இது தமிழ் வாக்கிய அமைப்பு முறை. This is a chair என்பதை 'இது ஒரு நாற்காலியாக இருக்கிறது' என்று மொழி பெயர்த்தால் பொருத்தமில்லாமல் இருக்கும்.

ஆனால் ஆங்கிலத்தில் verb இல்லாமல் வாக்கியம் அமைக்க முடியாது.

2 ) The milk is hot.   பால் சூடாக இருக்கிறது. இருக்கிறது' என்ற வினைச்சொல் தமிழில் வாக்கிய முடிவில் வருகிறது. ஆனால் ஆங்கில வாக்கியத்தில் 'is' என்ற verb எழுவாயைத் தொடர்ந்து வருகிறது - வாக்கியத்தின் முடிவில் இல்லை. இந்த வேறுபாட்டை உணர்ந்தால் ஆங்கிலத்தில் வாக்கியம் அமைப்பது எளிதாக இருக்கும்.

'ராமு பந்தை அடித்தான்' என்பதை ஆங்கிலத்தில் மொழி பெயர்க்க வேண்டுமானால், முதலில் இந்த வாக்கியத்தை (தொலைக்காட்சி விளம்பரங்களில் வருவது போல்) 'ராமு அடித்தான் பந்தை' என்று மாற்றிக்கொண்டு அப்படியே ஆங்கிலத்தில் 'Ramu hit the ball' என்று எளிதாக மாற்றி விடலாம். ('அது சரி, 'the' என்று அதிகப்படியாக ஒரு வார்த்தை வருகிறதே, அது எதற்கு?' என்ற சந்தேகம் வருகிறதா? அதை அப்படியே வைத்துக் கொள்ளுங்கள். பின்னொரு சமயம் இது பற்றிப் பேசுவோம்!.)

3) ஒருவரை, நீ எப்போது ஊரிலிருந்து வந்தாய்?' என்று கேட்டால் 'நேற்றுதான் வந்தேன்' என்ற பதில் வரலாம். ஆனால், இந்த வாக்கியத்தில் எழுவாய் எங்கே இருக்கிறது என்று கேட்டால் இல்லை என்றுதான் பதில் கூற வேண்டியிருக்கும். அனால் ஆங்கிலத்தில், எழுவாய் இல்லாமல் 'came yesterday'  என்று எழுதுவது தவறக இருக்கும்.

வாக்கியங்களைச் சுருக்கும் முறை ஆங்கிலத்தில் இருந்தாலும், எழுவாய் இல்லாமல் வினைச்சொல்லை மட்டும் பயன்படுத்தி வாக்கியம் அமைப்பதற்கு அனுமதி இல்லை!

முதலில் சில எளிய ஆங்கிலச் சொற்களின் பொருட்களை அறிந்து கொள்வோம்.
   I                    நான்
  We                 நாம் / நாங்கள்
  You               நீ / நீங்கள்
  He                அவன்
  She               அவள்
  It                   அது
  They              அவர்கள் / அவைகள்
  walk              நட
  run                ஓடு
  sit                  உட்கார்
  stand             நில்
  jump             குதி / தாண்டு
  pull               இழு
  push             தள்ளு
  play              விளையாடு
  open             திற
  close /shut     மூடு
  ask               கேள்
  take              எடு
  come            வா
  go                 போ / செல்
  put                வை
  give               கொடு
  sleep             தூங்கு
  eat                 சாப்பிடு / உண்
  drink             குடி / அருந்து
  speak            பேசு
  say / tell        சொல்
  read              படி
  write             எழுது
  see / look      பார்
  hear             கேள்
  listen            கவனி / கேள்
  observe       கவனி / பார்
  smell            நுகர் / வாசம் வீசு
  touch           தொடு
  taste            சுவை
  swim           நீந்து
  wait            காத்திரு
  cry              அழு / கதறு / கத்து
  weep          அழு / கண்ணீர் விடு
  rise  / climb  மேலே போ / ஏறு
  fall               விழு

ஆங்கிலத்தில் உள்ள ஆயிரக்கணக்கான வார்த்தைகளில் ஒரு சிலவற்றை மட்டும் எடுத்துக் கொண்டதற்குக் காரணம், இவற்றை வைத்து வாக்கியங்கள் அமைக்கப் பழகத்தான். வாக்கியம் அமைப்பது எப்படி என்பதை அறிந்து கொண்டால், பிறகு எந்த வார்த்தைகளை வைத்தும் வாக்கியங்கள் அமைப்பது எளிதாக இருக்கும்.
I come.                             நான் வருகிறேன்.
You go*.                          நீ போகிறாய் (அல்லது) நீங்கள் போகிறீர்கள்.
We read.                          நாங்கள் படிக்கிறோம்.
They run  .                        அவர்கள் ஓடுகிறார்கள் (அல்லது) அவை ஓடுகின்றன.
These eat.                         இவை உண்கின்றன.
Those sleep.                     அவை தூங்குகின்றன.

மேலே கொடுத்துள்ள உதாரணங்களில் இருந்து ஒன்றைப் புரிந்து கொள்ளலாம்.
மேற்கொண்ட எந்தப் பெயர்ச் சொல்லையும், எந்த வினைச் சொல்லையும் சேர்த்துப் பயன்படுத்தலாம்.

இப்போது வேறு சில உதாரணங்களைப் பார்க்கலாம்.

He walks                                             அவன் நடக்கிறான். (அல்லது) அவர் நடக்கிறார்.)
She sings                                            அவள் பாடுகிறாள்.
It grows.                                             அது வளர்கிறது.
This moves.                                         இது நகர்கிறது (அல்லது) அசைகிறது.
That falls.                                             அது விழுகிறது.
The Sun shines.                                   சூரியன் ஒளிர்கிறது.
The moon appears                                நிலவு தோன்றுகிறது.
The ball rolls.                                       பந்து உருளுகிறது.
The bus starts                                       பஸ் கிளம்புகிறது.
The man watches.                         (அந்த) மனிதன் (ஆள்) கவனிக்கிறான்(கவனிக்கிறார்)
The snake moves.                               பாம்பு நகர்கிறது (அசைகிறது)
The cow grazes.                                   பசு மேய்கிறது.
The calendar shows the date.                 காலண்டர் தேதியைக்  காட்டுகிறது.
The girl sings a song.                         (இந்தச்) சிறுமி ஒரு பாட்டுப் பாடுகிறாள்.
The cook prepares dinner.                   சமையற்காரர் இரவு உணவைத் தயாரிக்கிறார்.
The servant cleans the floor.                 வேலைக்காரர் தரையைச் சுத்தம் செய்கிறார்.
(அல்லது) துடைக்கிறார்.
The policeman catches the thief.           போலீஸ்காரர் திருடனைப் பிடிக்கிறார்.
The fridge cools the food.                 பிரிட்ஜ்(குளிர் சாதனப் பெட்டி) உணவுப்
பொருளைக் குளிர்ச்சியாக்குகிறது.
The student goes to school.                   மாணவன் பள்ளிக்குச் செல்கிறான்.
The hen lays eggs.                                 கோழி முட்டை போடுகிறது.  .

மேலே உள்ள வாக்கியங்களுக்கும் அதற்கு முன்பு உள்ள வாக்கியங்களுக்கும் உள்ள ஒரு வேறுபாட்டை நீங்கள் கவனித்திருந்தால்,நீங்கள் மிகவும் கவனமாகப் படித்து வருகிறீர்கள் என்று பொருள். பாராட்டுக்கள்!

அது என்ன வேறுபாடு?
முதலில் I come என்று வாக்கியம் அமைக்கப்பட்டது. ஆனால், இரண்டாவது பட்டியலில், He walks என்று வாக்கியம் அமைக்கப்பட்டது. இரண்டாவது வாக்கியத்தில், walk என்ற verb-இன் இறுதியில் s என்ற எழுத்து சேர்க்கப்பட்டுள்ளது. இது ஒரு முக்கியமான விதி. ஆங்கிலத்தில், எழுவாய் (subject) படர்க்கை ஒருமையாக (third person singular) இருந்தால், வினைச்சொல்லின் முடிவில் s சேர்க்க வேண்டும்.இதை எல்லா உதாரணங்களிலும் கவனிக்கலாம். comes, eats, sleeps, walks, reads, writes என்ற அமைப்பு Third person singular-க்கான வினைச்சொற்கள் என்பதை கவனத்தில் கொள்வது மிக மிக அவசியம்.ஓரளவு ஆங்கிலம் தெரிந்தவர்கள் கூட இந்த விதியை அறியாமல் இருப்பதைப் பார்த்திருக்கிறேன்.

do, go, catch, reach, miss, rush போன்ற சில வார்த்தைகளின் இறுதியில் es சேரும். இவை போன்ற வார்த்தைகள் அதிகம் இல்லை. எந்தெந்த வார்த்தைகளுக்கு es சேர்க்க வேண்டும் என்பதை நீங்களே விரைவில் உணர்ந்து கொள்வீர்கள். இது போல, fly, try போன்ற y - இல் முடியும் சில வார்த்தைகள் flies, tries என்று மாறும். (ஆனால், say, pay போன்ற y - இல் முடியும் வேறு சில வார்த்தைகள் says, pays என்றுதான் மாறும். ஓரளவுக்கு மொழியை எழுதி, பேசிப் பழகிய பிறகுதான், இந்த வேறுபாடுகளைப் புரிந்து கொள்ள முடியும்.